Rialacha bóthair agus an tsábháilteacht ar bhóithre

Níl aon dlíthe uile-Aontais ann i dtaca le rialacha agus sábháilteacht tráchta ar bhóithre. Mar sin féin, tá roinnt rialacha ann a bhfuil feidhm acu maidir le gach tír san Aontas, mar shampla:

• ní mór duit crios sábhála a chaitheamh i ngach feithicil, cóistí turasóireachta agus mionbhusanna ina measc
• ní mór srianta linbh cuí a bheith ar leanaí i ngluaisteáin agus i leoraithe (agus, nuair is féidir, i bhfeithiclí eile)
• tá cosc ar fhón póca a úsáid gan fearas lámhshaor agus tú ag tiomáint.

Rialacha tráchta náisiúnta

Is féidir le tíortha an Aontais rialacha éagsúla a bheith i bhfeidhm acu in go leor réimsí, cuir i gcás:

• an t-uasleibhéal alcóil san fhuil (tá roinnt tíortha ann nach gceadaíonn aon alcól a bheith san fhuil ag daoine agus iad ag tiomáint)
• luasteorainneacha i gcás cineálacha éagsúla bóithre agus feithiclí
• an trealamh sábháilteachta is gá a bheith i ngluaisteáin agus ag rothaithe
• úsáid éigeantach soilse reatha lae agus/nó bonn geimhridh
• tiomáint ar thaobh na láimhe clé den bhóthar (an Chipir, Éire agus Málta).

Faigh eolas sonrach faoi na rialacha atá i bhfeidhm i do thír dhúchais agus in aon tír eile san Aontas a bhfuil sé beartaithe agat cuairt a thabhairt uirthi nó idirthuras a dhéanamh inti.

Cionta tráchta

Chun feabhas a chur ar shábháilteacht ar bhóithre agus chun an líon básanna a laghdú, malartaíonn tíortha an Aontais eolas faoi chionta tráchta a bhaineann le sábháilteacht ar bhóithre. Ciallaíonn sé sin go bhféadfá fíneáil a fháil tríd an bpost sa bhaile má dhéanann tú cion tiomána agus tú ag tiomáint i dtír eile!

Féach freisin:

• ceadúnas tiomána agus árachas agus tú ag taisteal thar lear
• carr a fháil ar cíos i mBallstát eile